მუხლი 1. ქართული საარბიტრაჟო ტრიბუნალი

1.1. ,,ქართული საარბიტრაჟო ტრიბუნალი“ (LLP „Georgian Arbitration Tribunal”) არის მუდმივმოქმედი არბიტრაჟი, რომლის საქმიანობის საგანს წარმოადგენს ადგილობრივი და საერთაშორისო დავების განხილვა წინამდებარე წესების შესაბამისად.

1.2. მუდმივმოქმედი არბიტრაჟი თავის საქმიანობაში დამოუკიდებელია და კომპეტენციის ფარგლებში განიხილავს მხარეთა შორის წამოჭრილ კერძო ხასიათის ქონებრივ დავებს „არბიტრაჟის შესახებ“ საქართველოს კანონით და ამ დებულებით დადგენილი წესით.

1.3.არბიტრაჟს გადაწყვეტილება გამოაქვს მუდმივმოქმედი არბიტრაჟის სახელით.

1.4. არბიტრაჟის გადაწყვეტილება სავალდებულოა შესასრულებლად.

1.5. წინამდებარე დებულებაში „ქართულ საარბიტრაჟო ტრიბუნალზე“ მითითება წარმოადგენს მითითებას “ქართული საარბიტრაჟო ტრიბუნალის” ორგანიზაციულ ერთეულზე ან/და თანამდებობის პირზე, რომელიც სპეციალურად შექმნილია ან დანიშნულია დებულებით განსაზღვრული სათანადო ფუნქციების შესრულების მიზნით.

მუხლი 2. მოქმედების ფარგლები

2.1.- “ქართული საარბიტრაჟო ტრიბუნალი” დებულების შესაბამისად განიხილავს დავას, თუ:

2.1.1. მხარეები შეთანხმდებიან, რომ დავა განიხილება “ქართული საარბიტრაჟო ტრიბუნალის” საარბიტრაჟო წარმოების წესების შესაბამისად, “ქართული საარბიტრაჟო ტრიბუნალის” მიერ ან მსგავსი შინაარსის დათქმით.

2.1.2. მხარეთა საარბიტრაჟო შეთანხმება შედგა საარბიტრაჟო სარჩელისა და შესაგებლის გაცვლის გზით.

2.2. მხარეთა შეთანხმება დავის “ქართული საარბიტრაჟო ტრიბუნალის” მიერ გადაწყვეტაზე გულისხმობს შეთანხმებას წინამდებარე დებულებაზე.

2.3. „ქართული საარბიტრაჟო ტრიბუნალი“ საარბიტრაჟო განხილვისას ხელმძღვანელობს მხარეთა საარბიტრაჟო შეთანხმებით, წინამდებარე დებულებით და „არბიტრაჟის შესახებ“ საქართველოს კანონით (შემდგომში – კანონი).

2.4. ნორმათა კოლიზიის შემთხვევაში, უპირატესია, თანმიმდევრულად, მხარეთა შეთანხმება, დებულება, კანონი.

2.5. საარბიტრაჟო საქმის განხილვა წარიმართება დებულების იმ რედაქციის მიხედვით, რომელიც ძალაშია მხარეთა შორის დავის განმხილველ ორგანოდ „ქართულ საარბიტრაჟო ტრიბუნალზე“ შეთანხმების (წინამდებარე დებულების 2.1.1. მუხლის საფუძველზე დადგენილი კომპეტენცია) ან საარბიტრაჟო საქმის განხილვის დაწყების მომენტში (წინამდებარე დებულების 2.1.2 მუხლის საფუძველზე დადგენილი კომპეტენცია).

2.6. დაუშვებელია დავის წარმოების პროცესში შეცვლილი დებულების გამოყენება, გარდა იმ შემთხვევისა, თუ:

2.6.1. აღნიშნულზე არსებობს მხარეთა შეთანხმება, ან/და

2.6.2. საქმის სპეციფიკურობამ მოითხოვა ისეთი პროცედურული საკითხის მოწესრიგება, რომელიც მანამდე არ იყო დებულებით დარეგულირებული.

მუხლი 3. დებულებაში გამოყენებული ტერმინების განმარტება

3.1. „ქართული საარბიტრაჟო ტრიბუნალი“ უფლებამოსილია განმარტოს წინამდებარე დებულების ნებისმიერი ნორმა თავისი ინიციატივით ან ერთ–ერთი მხარის წერილობითი განცხადების საფუძველზე.

3.2.1. წინამდებარე დებულებაში მოცემულ ტერმინებს აქვთ შემდეგი მნიშვნელობა:

3.2.1. „ქართული საარბიტრაჟო ტრიბუნალი“, მუდმივმოქმედი არბიტრაჟი – შპს „ქართული საარბიტრაჟო ტრიბუნალი“ (ს/კ 402262993), ინგლისური სახელწოდება – LLP „Georgian Arbitration Tribunal“;

3.2.2. „არბიტრაჟი“- ერთი ან რამდენიმე წევრისაგან შემდგარი ორგანო, რომელიც უფლებამოსილია „არბიტრაჟის შესახებ“ საქართველოს კანონისა და წინამდებარე დებულებით დადგენილი წესით განიხილოს პირთა თანასწორობაზე დამყარებული კერძო ხასიათის ქონებრივი დავა;

3.2.3. მუდმივმოქმედი არბიტრაჟის თავმჯდომარე – შპს „ქართული საარბიტრაჟო ტრიბუნალის“ თავმჯდომარე, რომელსაც თანამდებობაზე ნიშნავს შპს „ქართული საარბიტრაჟო ტრიბუნალის“ პარტნიორთა კრება უვადოდ. მუდმივმოქმედი არბიტრაჟის თავმჯდომარე წინამდებარე დებულების მიზნებიდან გამომდინარე ახორციელებს არბიტრაჟის მიერ საარბიტრაჟო დავის განხილვისა და გადაწყვეტილების მიღების ადმინისტრირებას;

3.2.4. არბიტრი – პირი, რომელიც უფლებამოსილია „არბიტრაჟის შესახებ“ საქართველოს კანონითა და წინამდებარე დებულებით დადგენილი წესით განიხილოს პირთა თანასწორობაზე დამყარებული კერძო ხასიათის ქონებრივი დავა;

3.2.5. საარბიტრაჟო მოსარჩელე – პირ(ებ)ი, რომელმაც დავას განსახილველად გადასცემს არბიტრაჟს;

3.2.6. საარბიტრაჟო მოპასუხე – პირ(ებ)ი, რომლის წინააღმდეგაც წარდგენილია საარბიტრაჟო სარჩელი;

3.2.7. მხარეები – საარბიტრაჟო მოსარჩელე და საარბიტრაჟო მოპასუხე;

3.2.8. დავა – კერძო ხასიათის ქონებრივი დავა, რომელიც არბიტრაჟს გადაეცა განსახილველად;

3.2.9. სარჩელი– მოსარჩელის განცხადება, რომელიც მოიცავს მოთხოვნებს მოპასუხის მიმართ;

3.2.10. შესაგებელი – შეპასუხება სარჩელზე ან შემხვედრ სარჩელზე;

3.2.11. საარბიტრაჟო გადაწყვეტილება – მუდმივმოქმედი არბიტრაჟის მიერ საარბიტრაჟო საქმის განხილვის პროცესში მიღებული როგორც შუალედური, აგრეთვე საბოლოო გადაწყვეტილება;

3.2.12. არბიტრაჟის ხარჯები – საარბიტრაჟო მოსაკრებელი და დავის განხილვასთან დაკავშირებლი ხარჯები.

მუხლი 4. მუდმივმოქმედი არბიტრაჟის თავმჯდომარე

4.1. მუდმივმოქმედი არბიტრაჟის თავმჯდომარე ადმინისტრირებას უწევს არბიტრაჟის მიერ დავის განხილვის/გადაწყვეტილების მიღების პროცესს, ხელმძღვანელობს კანცელარიას და ახორციელებს შემდეგ საქმიანობას:

4.1.1. აკომპლექტებს ან დახმარებას უწევს მხარეებს არბიტრაჟის ფორმირებაში;

4.1.2. იღებს გადაწყვეტილებას არბიტრ(ებ)ის დანიშვნის ან შეცვლის შესახებ;

4.1.3. ინახავს დოკუმენტებს;

4.1.4. ამტკიცებს “ქართული საარბიტრაჟო ტრიბუნალის” არბიტრთა სიას;

4.1.5. ამზადებს დებულებაში შესატან ცვლილებათა პროექტს;

4.1.6. აკომპლექტებს კანცელარიას, უზრუნველყოფს მის გამართულ მუშაობას და შეიმუშავებს მისი მუშაობის სახელმძღვანელო წესებს;

4.1.7. წყვეტს სხვა საკითხებს, დებულებით გათვალისწინებული კომპეტენციის ფარგლებში.

4.1.8. მუდმივმოქმედი არბიტრაჟის თავმჯდომარე შეიძლება დაინიშნოს არბიტრად.

4.1.9. თუ მუდმივმოქმედი არბიტრაჟის თავმჯდომარე აღმოჩნდა ჩართული რომელიმე საარბიტრაჟო განხილვაში ან წარმოეშობა ინტერესთა კონფლიქტი საარბიტრაჟო საქმესთან დაკავშირებით საარბიტრაჟო განხილვის  მხარესთან პირადი, ან  საქმიანი ურთიერთობიდან ან საქმის შესაძლო შედეგებიდან გამომდინარე, მას არ აქვს უფლება მიიღოს მონაწილეობა საქმის განხილვაში.

მუხლი 5. “ქართული საარბიტრაჟო ტრიბუნალის” კანცელარია

5.1. “ქართული საარბიტრაჟო ტრიბუნალის” კანცელარია უზრუნველყოფს საარბიტრაჟო საქმის წარმოებისათვის საჭირო ლოჯისტიკური საქმიანობას, “ქართული საარბიტრაჟო ტრიბუნალის” თავმჯდომარის მიერ მიცემული მითითებებისა და 

5.1.1. იღებს და აგზავნის კორესპონდენციას;

5.1.2. ამზადებს საქმისწარმოების დოკუმენტაციას, საკუთარი კომპეტენციიის შესაბამისად;

5.1.3. უზრუნველყოფს საქმისწარმოების ელექტრონული ფორმით დამუშავებას;

5.1.4. უზრუნველყოფს არბიტრაჟში ელექტრონული ფორმით შემოსული ინფორმაციის დამუშავებას და შესაბამის მსვლელობას აძლევს მას;

5.1.5. უფლებამოსილია აწარმოოს ჩანაწერები და შექმნას დოკუმენტები მხარეთა და არბიტრ(ებ)ის ინფორმირების მიზნით, ასევე საარბიტრაჟო განხილვის სათანადოდ წარმართვისათვის;

5.1.6. ასრულებს თავმჯდომარის სხვა მითითებებს, საკუთარი კომპეტენციის ფარგლებში.

მუხლი 6. შეტყობინებები და მხარეებთან კომუნიკაცია

6.1. ნებისმიერი შეტყობინება ან გზავნილი ჩაითვლება მხარის მიერ მიღებულად, თუ ჩაბარებულია ადრესატისათვის ან მისი წარმომადგენლისათვის უშუალოდ, ფოსტით ან კურიერის მეშვეობით:

6.1.1 არბიტრაჟში წარდგენილ წერილობით დოკუმენტებში მითითებული იურიდიული, საცხოვრებელი ან სამუშაო ადგილის მისამართზე;

6.1.2. საარბიტრაჟო დავის მხარეებს შორის ხელშეკრულებაში მითითებულ მისამართზე;

6.1.3. შეტყობინების გაგზავნის დროს “ქართული საარბიტრაჟო ტრიბუნალისთვის” ადრესატის ცნობილ უკანასკნელ იურიდიულ, საცხოვრებელ ან სამუშაო ადგილის მისამართზე (იურიდიული პირის და ინდივიდუალური მეწარმის შემთხვევაში – სამეწარმეო რეესტრში რეგისტრირებულ მისამართზე).

6.2. თუ უწყების მიმტანმა პირმა ადრესატი ვერ ნახა საცხოვრებელ ადგილზე უწყება უნდა ჩაჰბარდეს მასთან მცხოვრებ ოჯახის რომელიმე ქმედუნარიან წევრს ხოლო თუ ისინი არ იმყოფებიან ადგილზე, იმავე სახლში მცხოვრებ სახლის მფლობელს ან დამქირავებელს, რომელიც თანახმა იქნება გადასცეს უწყება ადრესატს. სამუშაო ადგილზე უწყების გაგზავნისას, ადრესატის არ ყოფნის შემთხვევაში უწყება უნდა ჩაჰბარდეს ადრესატის თანამშრომელს. უწყების მიმღები პირი ვადლებულია, უწყების მეორე ეგზემპლაზე აღნიშნოს თავისი სახელი, გვარი, ადრესატთან დამოკიდებულება ან დაკავებული თანამდებობა.

6.3. შეტყობინების/გზავნილის მიწოდება შესაძლოა განხორციელდეს ელექტრონული ფოსტით ან სხვა საკომუნიკაციო საშუალებით, რომელიც იძლევა შეტყობინების მიწოდებისა და ჩაბარების მცდელობის დადასტურებას, მათ შორის ინფორმაციას ჩაბარების თარიღის შესახებ:

6.3.1. არბიტრაჟში წარდგენილ წერილობით დოკუმენტებში მითითებულ ელექტრონული ფოსტის მისამართზე;

6.3.2  .საარბიტრაჟო დავის მხარეებს შორის ხელშეკრულებაში მითითებული ელექტრონული ფოსტის მისამართზე;

6.3.3.  შეტყობინების გაგზავნის მომენტში „ქართული საარბიტრაჟო ტრიბუნალისთვის“ ადრესატის ცნობილ უკანასკნელ ელექტრონული ფოსტის მისამართზე (იურიდიული პირის და ინდივიდუალური მეწარმის შემთხვევაში სამეწარმეო რეესტრში რეგისტრირებულ ელექტრონული ფოსტის მისამართზე, ასეთის არსებობის შემთხვევაში).

6.4. შეტყობინება/გზავნილი, ჩაბარებულად ითვლება ადრესატისათვის მისი გადაცემის დღეს.

6.5. ელექტრონული გზავნილი/შეტყობინება მიღებულად ითვლება მისი გაგზავნის დღეს, გარდა იმ შემთხვევისა, როცა ელექტრონული ფომით გზავნილზე იმავე საშუალებით მიღებულია შეტყობინება, რომ ადრესატს ელექტრონული გზავნილი არ მიუვიდა.

6.6. „ქართული საარბიტრაჟო ტრიბუნალს“ შეუძლია შეტყობინება მიაწოდოს ადრესატს ან მის წარმომადგენელს ტელეფონით, რაც სათანადო ფორმით განხორციელებულ გადაცემად ჩაითვლება და არ არის აუცილებელი იგივე ინფორმაციის 6.1 და 6.3 მუხლებით გათვალისწინებული საშუალებით გადაცემა.

6.7. “ქართული საარბიტრაჟო ტრიბუნალის” კანცელარია თავად იღებს გადაწყვეტილებას შეტყობინების რომელი ფორმა გამოიყენოს, რომელ მისამართზე გააგზავნოს იგი და არ არის ვალდებული დაიცვას თანმიმდევრობა.

6.8. საარბიტრაჟო განხილვის მონაწილე ვალდებულია დაუყოვნებლივ აცნობოს “ქართული საარბიტრაჟო ტრიბუნალის” კანცელარიას საქმის წარმოების განმავლობაში მისამართის (მათ შორის ტელეფონის, ფაქსის, ელ. ფოსტის მისამართის) შეცვლის და ახალი მისამართის შესახებ.

6.9. საარბიტრაჟო განხილვისას, გაგზავნილის/კორესპონდენციის პირველად ჩაბარების დასტურის მიღების შემდგომ, “ქართული საარბიტრაჟო ტრიბუნალის” კანცელარია შემდგომ გზავნილებს აგზავნის პირველად ჩაბარების მისამართზე.

6.10. თუ მხარის ადგილსამყოფელი უცნობია ან მისთვის საარბიტრაჟო შეტყობინების ჩაბარება სხვაგვარად ვერ ხერხდება, არბიტრაჟი უფლებამოსილია გამოიტანოს დადგენილება საარბიტრაჟო შეტყობინების საჯაროდ გავრცელების შესახებ, რომლის განთავსებას ვებ-გვერდზე – GAT.GE, უზრუნველყოფს კანცელარია.

6.11. საჯარო შეტყობინება მხარისათვის ჩაბარებულად ითვლება მისი გამოქვეყნებიდან მე-7 დღეს.

6.12. თუ პირმა უარი განაცხადა გზავნილის ჩაბარებაზე, იგი ჩაბარებულად ითვლება, თუ მისამართი სწორია და გზავნილის/შეტყობინების ჩაბარებაზე უარი განაცხადა:

6.12.1 თავად ადრესატმა (პირველი გზავნილის შემთხვევაში);

6.12.2. ადრესატის ოჯახის სრულწლოვანმა წევრმა ან მასთან ერთად მცხოვრებმა ნებისმიერმა სრულწლოვანმა პირმა (მეორე გზავნილის შემთხვევაში);

6.12.3.  თანამშრომელმა/ორგანიზაციის წარმომადგენელმა სადაც ადრესატი მუშაობს (მეორე გზავნილის შემთხვევაში);

6.13. თუ პირველი საარბიტრაჟო გზავნილი/შეტყობინება ერთხელ უკვე ჩაჰბარდა ადრესატთან ერთად მცხოვრებ სრულწლოვან პირს ან ოჯახის წევრს, თანამშრომელს/ორგანიზაციის წარმომადგენელს სადაც ადრესატი მუშაობს, მეორედ გაგზავნა საჭირო აღარ არის.

6.14. ტექნიკური საშუალებით უწყების გაგზავნის ფაქტი დასტურდება: ტელეფონის შემთხვევაში – ტექნიკური საშუალებით დაბარების შესახებ შედგენილი აქტით; ელექტრონული ფოსტის შემთხვევაში – შესაბამისი ტექნიკური საშუალებით მოწოდებული დადასტურებით.

მუხლი 7. ვადები

7.1. საარბიტრაჟო მოქმედება სრულდება კანონით და ამ დებულებით დადგენილ ვადებში.

7.2. დებულებით გათვალისწინებული ვადის დენა იწყება შეტყობინების ჩაბარების დღის მომდევნო დღიდან.

7.3. გამოსათვლელ ვადაში ითვლება დასვენების და უქმე დღეები.

7.4. თუ ვადის ბოლო დღე არის ოფიციალური დასვენების ან უქმე დღე იმ სახელმწიფოში, სადაც განხორციელდა შეტყობინების ჩაბარება, ასეთი ვადა დასრულებულად ჩაითვლება მის მომდევნო პირველ სამუშაო დღეს.

7.5. დებულებაში მითითებული ნებისმიერი ვადა გამოითვლება კალენდარული დღეებით.